Psa 101 | MNA | STEP | Mboe ki Dabit O Yooba, nio aŋkam ŋgar pa mbulu ku, tana aŋtooro mboe ti bekena aŋbo mi aŋpakuru pa. Pa nu toto sua ku mbukŋana mi urur lelem pa wal ku, mi kamam mbulu ndeeŋeŋana men

aRo 13:4

Psalms 101

Mboe 101

Suŋŋana ki king ambaiŋana ta itoto Anutu leleene

Mboe ki Dabit

1 O Yooba, nio aŋkam ŋgar pa mbulu ku, tana aŋtooro mboe ti bekena aŋbo mi aŋpakuru pa.
Pa nu toto sua ku mbukŋana mi urur lelem pa wal ku, mi kamam mbulu ndeeŋeŋana men
2 Mi zaala ku na, ndabokŋana kat.
Tanata leleŋ ambai pu mi aŋtooro mboe ti.
Mi ŋiizi na mar uulu yo?
Pa nio aŋkamam mbulu ŋgeezeŋana men lela ruumu tio.
Mi peeze ta aŋkamam, ina indeŋdeeŋe men.
3 Nio aŋyok be koroŋ sananŋana sa imbot su kereŋ uunu na som.
Mi zin wal ta tipaŋobŋoobo pa zaala ku na, nio aŋurur koi pizin mi aŋzirziiri zin ma tila len.
Kokena tikeske yo pa mbulu kizin sananŋana.
4 Zin wal ta lelen bok pa ŋgar pakaamŋana na, aŋzirziiri zin ma timbotmbot molo pio.
Mi zin wal sananŋan na, aŋgabgaaba zin som.
5 Zin wal ta tiŋgalŋgal sorok sua pizin tomtom na, aŋkazas zin bekena aŋpumun kwon.
Mi zin wal ta tipakurkur zitun mi tikamam be tiwe bibip na, leleŋ be tigarau yo risa som.

6 Mi zin wal ki toono ti ta titoto zaala ku mi tizzo sua ŋonoono na, motoŋ pizin, mi aŋkamam zin ma timbotmbot raama yo.
Zin wal ta tipa pai kizin ma iŋgeeze men na, zin ta tiwe mbesooŋo tio mi tiuluulu yo pa uraata.

7 Tamen zin wal ta tikamam mbulu pakaamŋana na, irao timbot lela ruumu tio na som.
Pa zin wal ta tizzo sua pakaamŋana na, aŋzirziiri zin ma timbot molo pio.
8 Aigule ta boozomen, zoŋ ise na, aŋkazas zin wal sananŋan ta timbotmbot toono ti, bekena aŋpumun kwon.
Zin wal ta tikamam mbulu sananŋana na, aŋzirziiri zin pa Yooba kar kini ma timap ma tila len. ^a